دەربارەی نوسەر

دەهام موحەمەد، پسپۆری بواری ژیریی دەستکردە. لە یەکێک لە بەرزترین ئاستەکانی ئەم بوارە لە ئەڵمانیا کار دەکات. ئەم وتارە دوای ڕووخسەتی خۆی بە دەستکاری خاڵبەندییەوە لێرە دانراوە بە سوپاسەوە.

دەستەواژەی «State-of-the-Art» (کە بە کورتی پێی دەوترێت SOTA)، نە ناوی کۆمپانیایەکە، نە بەرهەمێکە، نە جۆرە تەکنەلۆژیایەکی دیاریکراویشە. بەڵکو تەنها «نازناوێکە» دەدرێتە هەر مۆدێلێکی ژیریی دەستکرد، کە باشترین ئەنجامی تۆمار کردبێت لە جێبەجێکردنی ئەرکێکی دیاریکراو و ستاندارددا. ئەم نازناوە شتێکی جێگیر نییە و کێبڕکێیەکی توندی لەسەرە. چونکە بەردەوام مۆدێلی نوێ و بەهێز دەردەکەون بۆ ئەوەی پلەی یەکەم داگیر بکەن.

چۆن مۆدێلێک ئەم نازناوە بەدەست دەهێنێت؟

ئەمە پەیوەستە بە کێبڕکێ بۆ دڵنیابوون لەوەی هەموو مۆدێلەکان بەیەکسانی تاقی دەکرێنەوە. توێژەران «پێوەرەکان» (Benchmarks) بەکار دەهێنن، کە بریتیین لە کۆمەڵە داتا و یاسای هەڵسەنگاندن و بە وردی دیزاین کراون بۆ ئەوەی مۆدێلەکە بخەنە ژێر قورسترین تاقیکردنەوەوە لە بوارێکدا.

کاتێک مۆدێلێک لە یەکێک لەم پێوەرە فەرمییانەدا نمرەیەکی بەرزتر لە هەموو ڕکابەرەکانی پێش خۆی بەدەست دەهێنێت، ئەوا نازناوی SOTA وەردەگرێت. ئەم دەستکەوتەش بەزۆری لە توێژینەوەیەکدا بڵاو دەکرێتەوە و لە لیستی ڕیزبەندییە گشتییەکاندا دەخرێتە ڕوو بۆ ئەوەی هەمووان بیبینن.

سەرهەڵدانی مۆدێلی «Gemini 3.0 Pro Preview»

سەرهەڵدانی مۆدێلی «Gemini 3.0 Pro Preview» وەک نوێترین نموونەی باڵای مۆدێلەکان (SotA Reasoning)، وەرچەرخانێکی گەورەی لە توانای شیکارکاریی ژیریی دەستکرددا دروست کردووە.

مۆدێلەکانی SOTA، مۆدێلە زمانییە گەورە و تایبەتمەندەکانن، کە بە دیاریکراوی بۆ ئەنجامدانی ئەرکە ئاڵۆزەکانی لێکدانەوە و شیکارکردن باش کراون. بەمەش لە سنووری ڕیزبەندیی وشەکان و گەڕان بەدوای واتادا تێپەڕیون. ئەم مۆدێلانە توانایەکی بەرزیان هەیە لە بوارەکانی:

• بیرکاری
• لۆژیکی فەرمی
• یاسادا

ئامانجیان گەیشتنە بە ئاستی توانای مەعریفیی/زانینزانی مرۆڤ یان تێپەڕاندنی. پێشکەوتنەکانی ئەم دواییە پشت دەبەستن بە: کۆمەڵە داتای تایبەتمەند بۆ کەمکردنەوەی لایەنگیری، بەکارهێنانی ئەلگۆریتمەکانی وردکردنەوەی پێشکەوتوو (Advanced Fine-tuning) و تێکەڵکردنی توانای مۆدێلەکان لەگەڵ ئامرازە دەرەکییەکان بۆ چارەسەرکردنی کێشەکان بە شێوەیەکی سیستماتیک.

میتۆدۆلۆژی و تەلارسازی

لە ڕووی میتۆدۆلۆژی و تەلارسازییەوە، ئەم مۆدێلانە بەرەو سیستەمی تێکەڵاو هەنگاو دەنێن. تێیدا مۆدێلەکە ڕۆڵی وەرگێڕ و ڕێکخەر دەبینێت، نەک تەنها لێکدەرەوەیەکی سەربەخۆ. بۆ نموونە: لە لێکدانەوەی لۆژیکیدا، دەقە سروشتییەکان وەردەگێڕدرێن بۆ شێوازی هێمایی تا لەلایەن چارەسەرکەرە دەرەکییەکانەوە شیکار بکرێن. هەروەها ستراتیژییەکانی وەک دابەشکردن و زاڵبوون بەکار دەهێنرێن بۆ جیاکردنەوەی پرسیارە ئاڵۆزەکان لە پرسیارە ئاسانەکان بەپێی ئاستی دڵنیایی. کە ئەمەش کارایی مۆدێلەکە بەرز دەکاتەوە و تێچووی وزە کەم دەکاتەوە. توێژینەوەکان دەریدەخەن، کە هاوسەنگکردنی مۆدێلەکان لەگەڵ دوو شێوازی بیرکردنەوەی مرۆڤ (واتە: سیستەمی خێرا و هەستی، بەرامبەر سیستەمی هێواش و شیکاری) کاریگەریی ڕاستەوخۆی لەسەر ئەنجامەکان هەیە. بە جۆرێک مۆدێلە خێراکان لە زانیارییە گشتییەکاندا باشترن و مۆدێلە شیکارییەکان لە بیرکاریدا زاڵن.

ئاڵنگاریی ئێستا و ئاڕاستەی داهاتوو

سەرەڕای پێشکەوتنەکان، هێشتا ئاڵنگاریی گەورە بوونی هەیە لە بەکارهێنانی ئەم مۆدێلانە لە جیهانی واقیعیدا. بەتایبەت لە ئەرکە کراوەکان و لێکدانەوەی شوێنکاتیدا. چونکە هێشتا لە دواوەن بە بەراورد بە مۆدێلە تایبەتمەندەکان. زیادەڕەوی لە هەنگاوەکانی لێکدانەوە مەرج نییە هەمیشە باشتر بێت. چونکە لەوانەیە ببێتە هۆی کەڵەکەبوونی هەڵەکان و دروستبوونی وەهمی لۆژیکی. ئاڕاستەی داهاتووی ئەم بوارە زانستییە بەرەو بەهێزکردنی لێکدانەوەی هۆکاری و فێربوونی میکانیزمەکان دەڕوات بۆ ئەوەی لە ناسینەوەی شێوازەکان تێپەڕێت. توێژەران ئێستا کار لەسەر پەرەپێدانی تۆڕی مۆدێلە بچووکەکان دەکەن، کە بە شێوەی هەرەوەزی و لە ڕێگەی ئاڵوگۆڕی زانیارییەوە هەڵەکانی یەکتر ڕاست دەکەنەوە. ئەمەش وا دەکات بە تێچوویەکی کەمتر ئەنجامی وردتر بەدەست بێت و ئاماژەیە بۆ وەرچەرخانێک بەرەو مۆدێلگەلێک، کە فێربوونی ئاماری و لێکدانەوەی لۆژیکی تێکەڵ دەکەن.