کێشەی پیتە بزوێنی خڕ و پیتی کاف "ە + ک، ك"
لەوانەیە سەرنجی ئەوەت دابێ کاتێک دەنووسیت "مه‌کۆ" پەنجە بە چوار کلیلدا دەنێیت لەسەر تەختی کلیلەکان (Keyboard) وە ڕووکەش کە دەیبینیت تەنها لە چوار پیت پێکهاتووە، بەڵام کە دەیسڕیتەوە ئەبێت 5 جار پەنجە بنێیت بە کلیلی Backspace تا هەموو پیتەکان بسڕێنەوە. ئایا بۆ؟
لە دواترین وەشانی تەختەکلیلی کورد ئایتی گروپ بۆ ویندۆز پیتە بزوێنی خڕ بەم شێوەیە پێناسە کراوە "پیتی هاء(ه)+nonjoiner "nonjoiner بریتییە لە جیاکەرەوەیەکی نەبینراوی وەک "|" کە لە پاش پیتی "ه" دێت تا نەهێڵێت پیتی هاء بە پیتی پاش خۆیەوە بلکێت بەو شێوەیەش وەک پیتە بزوێن دەردەکەوێت. کەواتە کاتێک پیتی بزوێن دەنووسیت لە دوای پیتی هاء، nonjoiner دێت. بە هەردوو پیتی هاء و nonjoiner پیتی بزوێن پێکدەهێنن. هەر ئەم nonjoiner ـەش هۆکاری ئەوەیە کە لە هەندێک پڕۆگرام ناتوانین پیتی بزوێن بنووسین.
بۆ پیتی "کاف" ـیش دوو پیتی جیاوازمان هەیە کە هەریەکەیان بە جۆرێک پێناسە کراون و بە جۆرێک دەردەکەون لە کۆتاییدا، بۆ نمونە وشەی "پاک، پاك" بەڵام لە سەرەتا و ناوەڕاستدا وەک یەکن، بۆ نمونە لە وشەی "کورد، كورد".
جیاوازی تەختەکلیلی کوردی لە نێوان سیستەمە کارگێڕییەکاندا
هەموو ئەمانە لە ویندۆز، بەڵام لە لینوکس لەسەر تەختەکلیلی کوردی پیتیە بزوێنی خڕ بە دروستی پێناسە کراوە و هیچ کێشەیەکی نییە. کەواتە لێرەدا دوو پیتی بزوێنمان هەیە لە ڕوواڵەتدا وەک یەکن بەڵام بە دوو شێوەی جیا پێناسە کراون.
گەڕان لە بزوێنەری گەڕانەکاندا
بوونی دوو پیت بە دوو شێوازی جیا زۆر کێشەدارە کە لە بزوێنەری گەڕانەکاندا وەک دوو پیتی جیاواز چاویان لێ دەکرێت ئەمەش ئەبێتە هۆی ئەوەی کە ئەنجامەکان بە دروستی نەدۆزرێنەوە. بۆ نمونە تۆ زانیاریت پێویستە دەربارەی کۆمپیوتەر بۆیە لە گووگڵ بە دوای وشەی "کۆمپیوتەر" دەگەڕێیت، ئەو وشەیەی تۆ بە شێوەیەک نووسیوتە کە پیتی کاف تیایدا بریتیە لە "ک" و پیتە بزوێنی خڕی دروست بەکاردەبەیت (واتە "ـە" نەک "ـە|") بەڵام کەسێک کە لە ماڵپەڕەکەی خۆی ئەو وشەیەی بە تەواوەتی بە پێچەوانەی تۆوە نووسیوە ("ك" لەگەڵ "ـە|") لەم کاتەدا ئەو بابەتە وەک ئەنجامێک بۆت نادۆزرێتەوە. تەماشای ئەم دوو ئەنجامە جیاوازەی گەڕان بکە لە گووگڵ بۆ وشەی "کۆمپیوتەر":
بەستەری یەکەم، پیتی "ک" + "ـە"
تەختەکلیلەکە
چاوگ تەختەکلیلێکی نوێی دروستکردووە کە پیتە بزوێنەی پێناسەکراوی لەسەر جێگیرکراوە. پیتە بزوێنەکە لە ویندۆزی XP ـدا لەگەڵ هەندێک فۆنتی وەک Tahoma و Arial و ...هتد کێشەیەکی هەیە کە بە پیتی پێش خۆیەوە نالکێت، بەڵام لەگەڵ فۆنتەکانی یونیکورد بێ کێشەیە. ئەوەی مایەی خۆشحاڵییە لەسەر ڤیستا و ویندۆز ٧ لەگەڵ هیچ فۆنتێکی نووسینی ئاساییدا کێشەی نییە و بە پیتەکانەوە دەلکێت. لە وێنەکەی سەرەوە ڕوونتر دەردەکەوێت کە بە فۆنتی تەهۆما لەسەر XP و Vista پیتە بزوێنە خڕەکان بە چ شێوەیەک دەردەکەون.
شێوازەکانی
تەختەکلیلەکە بە دوو شێواز دروستکراوە یەکێکیان لەسەر بنەمای تەختەکلیلی ئینگلیزی ئەوی تریان لەسەر بنەمای تەختەکلیلی عەرەبی تا نەبێتە کێشە بۆ ئەوانەی تا ئێستاش لەسەر تەختەکلیلی عەرەبی ئەنووسن.
داگرتن و دامەزراندن
تەختەکلیلی عەرەبی تەختەکلیلی ئینگلیزی
لەو دوو بەستەرە ئەتوانی تەختەکلیلەکان دابگریت کە لە پەڕگەیەکی پەستێنراودان هەریەکەیان پەڕگەی دامەزراندن و وێنەی پیتەکانی تیادایە لەسەر تەختەکلیلەکە. بۆ دامەزراندن کرتە لە پەڕگەی دامەزراندن بکە لە بوخچەی تەختەکلیلەکەدا پاشان لە Task bar کرتەی ڕاست لە language bar بکە پاشان Settings (یان لە Control Panel ـدا Regional and Languages بکەرەوە پاشان تابی Keyboard and Languages و کرتە لە Change Keyboards بکە یان لە ویندۆز xp کرتە لە Details بکە) دواتر وەک ئەوە بکە کە لە وێنەکەدایە (ئەگەر تەختەکلیلەکە لە لیستە بچووکەکەدا نەبوو، کرتە لە show more بکە بۆ پیشاندانی لیستی هەموو تەختەکلیلەکان.
چارەسەر لە XP
هۆکاری ئەو پێکەوە نەلکانە دەگەڕێتەوە بۆ وەشانی فۆنتەکان. ئەتوانیت بە دامەزراندنی وەشانی نوێتری فۆنتەکان ئەو کێشەیە نەهێڵیت. لێرە یان لێرەوە وەشانی ڤیستای هەردوو فۆنتی Tahoma و Arial دابگرە. پاشان پڕۆگرامی AMP Font Viewer دابگرە بۆ گۆڕینی فۆنتەکان. کاتێک پڕۆگرامەکە دەکەیتەوە لە تابی installed fonts ـدا هەردوو فۆنتی Tahoma و Arial بسڕەوە (کرتەی ڕاست لە فۆنتەکە بکە و پاشان کرتە لە Uninstall Font بکە). بۆ فۆنتی Tahoma کاتێک دەیسڕیتەوە، تەنها Tahoma دیاری بکە، نابێت Tahoma Bold بسڕیتەوە. پاشان بجۆ تابی Not installed Fonts ـەوە، شوێنی فۆنتە نوێیەکان دیاری بکە و کرتە لە Install selected font بکە.
تێبینی:
١. ئەتوانیت هەر فۆنتێکی تر بە هەمان ڕێگا دابمەزرێنیت.
٢. ئەتوانیت دەستکارانە لە بوخچەی ./windows/fonts فۆنتی Arial نوێبکەیتەوە بەبێ پێویستبوون بە هیچ پڕۆگرامێک.