سیمبیان (ئینگلیزی Symbian) سیستەمی کارپێکردنی ژێدەرکراوەی تایبەت بە مۆبایلە و زۆرترین بازاڕی لە سیستەمەکانی مۆبایل داگیرکردووە بە شێوەیەک کە لە هەر ٣ مۆبایلێک یەکێکیان سیستەمی سیمبیانی لەسەرە.
لە سەرەتاوە لە لایەن Symbian ltd ـیەوە پەرەی پێ دراوە تا لە حوزەیرانی ساڵی ٢٠٠٨ نۆکیا پشکەکانی تری Symbian ltd کڕی و دامەزراوەی سیمبیانی دروست کرد. دیسانەوە لە مانگی تشرینی دووەمی ساڵی ٢٠١٠ نۆکیا سیمبیانی خستەوە ژێر دەسەڵاتی خۆی و دامەزراوەی سیمبیانی ڕاسپارد بە ڕێکخستنی مۆڵەتدانی سیستەمەکە بەو کۆمپانیایانەی سیمبیان لە مۆبایلەکانیاندا بەکاردەهێنن.
مێژوو
یەکەم وەشانی ناوکی سیمبیان دەگەڕێتەوە بۆ ساڵی ١٩٩٠ کە لە کۆمەڵە ئامێرێکدا بە ناوەکانی Psion Series 3 فرۆشران لە نێوان ساڵانی ١٩٩١ بۆ ١٩٩٨. لە ساڵی ١٩٩٤ هەموو سیستەمەکە بە C++ لەسەر سیستەمی32-bit نووسرانەوە.
سیمبیان و سەرچاوەکراوە
پاش نیوەڕۆی ٤ی شوباتی ٢٠١٠ سیستەمی کارپێکردنی Symbian OS تەواوی کۆدەکانی کرد بە سەرچاوەی کراوە و خرانە بەردەست بۆ پەرەپێدەران. پێشتر تەنها ناووکی Kern سیستەمەکە لەڕێگەی مۆڵەتی گشتی Eclipse خرابووە بەردەست، بەم کردارە هەموو داوانامە و نەرمەکاڵاکانی سیستەمەکە کراون بە سەرچاوەکراوە.
هەنگاونان بەرەو ژێدەرکراوەبوونی سیمبیان لە ساڵی ٢٠٠٨ەوە دەستی پێکرد پاش ئەوەی نۆکیا زۆرینەی پشکەکانی ئەو کۆمپانیایەی کڕی و، دامەزراوەی سیمبیانی دروستکرد. کە ئەمەش یەکێکە لەو هەوڵانەی نۆکیا داویەتی بۆ زیندوکردنەوەی سیمبیان بەتایبەت لەدوای ئەو گەشە خێرایەی iPhone و Android و دابەزینی ڕێژەی بەکارهێنانی سیمبیان، زۆرێک پێیان وایە کە سیمبیان سیستەمێکی کۆنە و وردەوردە بەکارهێنانی ڕوو لە کەمی دەکات و سیستەمەکانی تری جێگەی دەگرنەوە.